CHAMA cha Jamii (CCJ) leo kinaanza kuonyesha hadharani ubavu wake kitakapofanya mkutano wake wa kwanza wa hadhara, jijini Dar es Salaam, kikiwa kimealika vigogo wa CCM kushuhudia.
Katibu Mwenezi wa CCJ, Dickson Ng'hily alitamba kuwa uzinduzi huo utatia fora na kuonyesha jinsi chama hicho kinachotafuta usajili wa kudumu kwa udi na uvumba, kilivyojiandaa kuichukua nchi.
Akionekana kujiamini, alisema katika uzinduzi huo ambao utafanyika Mwananyamala 'A', amewaalika vigogo wa CCM kushuhudia.
"Tumevialika vyama vyote vya siasa... CCM tumemwaliki mwenyekiti (Rais Jakaya Kikwete), Katibu Mkuu Yusuf Makamba na mweka hazina wao," alisema Ngihily.
Mbali na wanasiasa hao, Ng'hily alisema amemwalika Msajili wa Vyama vya Siasa John Tendwa ili ashuhudie wakitangaza kujikusanyia zaidi ya wanachama 7,000.
Lengo la bashasha hizo, alisema, ni kuudhihirishia umma uwezo wa CCJ ikiwa ni siku moja kabla ya kuwasilisha majina ya wanachama wake kwa msajili.
"Kesho tutampelekea Mheshimiwa Tendwa majina ya wanaotuunga mkono ili kukamilisha taratibu za kupata usajili wa kudumu," alisema Ng'hily akidai lengo la chama hicho ni kuwahi kushiriki uchaguzi ujao.
0 comments